كاسىپقوي بوكسقا قايتا ورالعان بەيبىت شۇمەنوۆ استانادا WBA (Regular) چەمپيوندىق بەلبەۋى ءۇشىن جەكپە-جەك وتكىزەدى, - دەپ حابارلايدى Vesti.kz. ءبىرىنشى اۋىر سالماقتا باق سىنايتىن وتانداسىمىزدىڭ قارسىلاسى - تۇرىك بوكسشىسى حيزني التۋنكاي (30-1, 17 كو).
34 جاستاعى قازاقستاندىق بوكسشى بۇل چەمپيوندىق بەلبەۋدى وسىعان دەيىن دە يەلەنگەن. كەيىننەن جاراقاتىنا بايلانىستى مانسابىن اياقتاعان ەدى. قاڭتار ايىندا كاسىپقوي بوكسقا قايتا ورالعانىن حابارلاعان بولاتىن.
قازىرگى تاڭدا بەيبىت شۇمەنوۆ بۇكىلالەمدىك بوكس قاۋىمداستىعىنىڭ (WBA) چەمپيوندىعىنا ۇمىتكەرلەر قاتارىندا ەكىنشى ورىندا. ۋاقىتشا چەمپيوندىق اتاققا يە فرانتسۋز (تەگى ارميان) ارسەن گۋلاميريانعا عانا جول بەرىپ تۇر. ول قازاقستاندىق گەننادي گولوۆكينمەن بىرگە جاتتىعاتىن بوكسشىلاردىڭ ءبىرى.
تۇرىك بوكسشىسى حيزني التۋنكاي بولسا WBA تىزىمىندە ءۇشىنشى قاتاردا تۇر. مانسابىنداعى جەكپە-جەكتەرىنىڭ بارلىعىن دەرلىك گەرمانيادا وتكىزگەن. تەك 2017 جىلى گدانسكىدە (پولشا) وتكىزگەن وزگە ەلدەگى جالعىز جەكپە-جەگىندە جەڭىلگەن. WBF جۇيەسى بويىنشا ۋاقىتشا چەمپيوندىق اتاققا يە بولعان. ءبىر كەزدەرى GBC قۇرلىقتىق بەلبەۋىن يەلەنگەن بوكسشىنىڭ ءبىرى.
بەيبىت شۇمەنوۆ پەن حيزني التۋنكاي اراسىنداعى جەكپە-جەك 7 شىلدە كۇنى استانادا وتەدى. سونداي-اق وسى كۇنى ەلوردادا WBA ديرەكتوراتىنىڭ كەڭەسى بولادى.
ايتا كەتەيىك, ءبىرىنشى اۋىر سالماقتا WBA سۋپەرچەمپيونى اتاعىنا يە بوكسشى - رەسەيلىك مۋرات گاسسيەۆ. ول دا گەنانىڭ جاتتىقتىرۋشىسى ابەل سانچەسپەن بىرگە دايىندالاتىن بوكسشىلاردىڭ ءبىرى.